ភ្នំពេញ៖ អគ្គមេបញ្ជាការរកកងយុទ្ធពលខេមរភូមិន្ទ និងជាមេបញ្ជាការទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានបង្ហាញនូវសុភាសិតចំនួន៤ ដែលសម្ដេចតេជោ និងសម្ដេចកិត្តិព្រឹទ្ធបណ្ឌិតតែលើកមកព្រានប្រដៅកូន។

សុភាសិតទាំងនោះមាន៖

១. កុំតាំងខ្លួនជាកូននាយករដ្ឋមន្ត្រី តែត្រូវតាំងខ្លួនជាចៅកសិករ...

២. ការរាប់អានមនុស្សមិនត្រូវមើលលើគេមានទ្រព្យសម្បត្តិ ឬជាកូនលោកធំនោះឡើយ... ប៉ុន្តែលើទឹកចិត្តល្អ...

៣. ត្រូវខំរៀន... ព្រោះចំណេះវិជ្ជាសំខាន់សម្រាប់ខ្លួនឯង និងប្រទេសជាតិ។

៤. ត្រូវធ្វើតែអំពើល្អ និងចេះជួយគ្នានៅពេលត្រូវការ។

លោក ហ៊ុន ម៉ាណែត បានបង្ហោះលើបណ្ដាញសង្គមហ្វេសបុករបស់លោកថា កន្លងមកមានលោកយាយលោកតា លោកអ៊ុ ពូមីង ជាច្រើនធ្លាប់បាននិយាយប្រាប់លោកថា ឪពុកម្តាយរបស់លោក ចិញ្ចឹមកូនបានល្អៗណាស់ ទាំងប្រុស ទាំងស្រី គឺស្លូតបូត សុភាពរាបសា ចេះគោរពចាស់ទុំ និងចេះស្រលាញ់គ្នា។

លោក ហ៊ុន ម៉ាណែត បានអរគុណ និងបញ្ចាក់ថាលទ្ធផលទាំងនេះគឺដោយសារឪពុកម្ដាយរបស់លោកតែងអប់រំនិងប្រៀនប្រដៅជានិច្ចនូវ សីលធម៌ គុណធម៌ ការតស៊ូព្យាយាម និងក្ដីស្រលាញ់។

លោកសរសេរថា៖ «លទ្ធផលទាំងនេះគឺមានដោយសារអ្នកមានគុណទាំងពីររបស់ខ្ញុំ គឺលោកឪពុក និងអ្នកម្តាយរបស់ខ្ញុំ ដែលគាត់តែងតែណែនាំព្រានប្រដៅកូនៗទាំងអស់ជាប់ជាប្រចាំ អោយប្រព្រឹត្តិនូវអំពើល្អ ប្រកាន់ឃ្ជាប់នូវសីលធម៌ គុណធម៌ ការតស៊ូព្យាយាម និងចេះស្រលាញ់ជួយយកអាសារគ្នា តាំងតែពីបងប្អូនរបស់ខ្ញុំនៅតូចៗម៉្លេះ»៕